21 avril 1301

Edition : Georges Digard, Maurice Faucon, Antoine Thomas, Robert Fawtier, Les registres de Boniface VIII - Recueil des bulles de ce pape publiées ou analysées d’après les manuscrits originaux des archives du Vatican, 1884-1939, n° 4111 (CLXXXI)

Original : Reg. 50, fol. 46

Extrait : Collection Périgord, vol. 33, fol. 25 r° et 25 v° (donné par erreur sous l’année 1300)

Conceditur magistro Bernardo Royardi, archidiacono Xanctonensi, quod non teneatur prestare homagium episcopo Xanctonensi.

Magistro Bernardo Royardi, archidiacono Xanctonensi, capellano nostro ac nostri palatii auditori causarum.

Dum ad tua laudabilia merita placidamque familiaritatem, per que nostram tibi benivolentiam vindicasti, considerationis nostre vertimus aciem, Apostolico te favore dignum conspicimus ac prerogativa gratie specialiter attollendum. Ex tenore siquidem tue petitionis accepimus, quod tu, ratione archidiaconatus, quem in ecclesia Xanctonensi obtines, secundum antiquam consuetudinem ipsius ecclesie, teneris venerabili fratri nostro ... episcopo Xanctonensi personaliter homagium facere ac prestare fidelitatis etiam juramentum, quodque in quadam constitutione, dudum per venerabilem fratrem nostrum ... archiepiscopum Burdegalensem, loci metropolitanum, ejusque suffraganeos in provinciali concilio edito, inhibetur sub excommunicationis pena, quam contra facientes eo ipso incurrant, ne archidiaconi et alii hujusmodi minores prelati provincie Burdegalensis vicarios constituant, nisi forsan, absentes justa de causa, hoc de suorum faciant licentia prelatorum. Nos itaque, volentes tibi, premissorum meritorum tuorum consideratione, ac obtentu dilectii filii nostri J[acobi], Sancti Georgii ad Velum Aureum diaconi cardinalis, nobis pro te super hoc humiliter supplicantis, ne, occasione constitutionis et consuetudinis predictarum, circa dictum archidiaconatum et jura ipsius detrimentum aliquos patiaris, de remedio consulere oportuno, auctoritate tibi presentium indulgemus, ut, quamdiu Apostolice Sedis obsequiis de mandato Sedis ejusdem institeris, vicarium in archidiaconatu predicto, ad jurisdictionem, quam ibi de consuetudine obtinere te asseris, exercendam, et alia, que tibi ratione dicti archidiaconatus incumbunt, constituere libere valeas et habere, et ad faciendum interim in ipsa ecclesia residentiam personalem vel ad exhibendum homagium et juramentum predicta eidem episcopo per te ipsum, dummodo illa sibi per procuratorem ydoneum, et, cum ad ecclesiam ipsam perveneris, corporaliter ea prestes, minime tenearis, neque ad hec a quoquam valeas coartari; non obstantibus constitutione et consuetudine supradictis, seu quibuscunque contrariis ejusdem ecclesie statutis et consuetudinibus, juramento, confirmatione Sedis predicte vel quacunque firmitate alia roboratis, etiamsi de illis servandis et non impetrandis litteris Apostolicis contra ea, vel non utendo etiam impetratis, per te vel procuratorem tuum, prestiteris forsitan juramentum, seu quibuscunque litteris et indulgentiis Apostolicis, generalibus vel specialibus, quibuscunque et in quacunque forma concessis, de quibus quorumque totis tenoribus de verbo ad verbum specialem oporteat in nostris litteris fieri mentionem. Proviso quod archidiaconatus ipse debitis obsequiis non fraudetur, et animarum cura, si illa sibi immineat, nullatenus negligatur. Ceterum ipsi episcopo per hoc nolumus circa hujusmodi consuetudinem alias prejudicium generari. Nulli ergo, et cetera, nostre concessionis, et cetera. Datum Laterani, XI kal. maii, anno septimo.

In eundem modum, dilectis filiis ... abbati secularis Albaterrensis, Petragoricensis diocesis, et ... archidiacono de Bragayreico, Petragoricensis, ac ... sacriste Caturcensis ecclesiarum.